Innuttaasut ineriartornerat

Innuttaasut

Kalaallit-Nunaata inuisa pingajorarterutingajaat Qaasuitsup Kommuniani najugaqarput. Ulloq 1.1.2013 kommunip illoqarfiini nunaqarfiinilu najugaqarput inuit 17.498-t. Innuttaqassuseq 2012-mi 1 %-mik appariarpoq (inuit 189-t). Innuttaqassuseq 2003-miit ataatsimut isigalugu 7 %-mik appariarsimavoq. Appariaat inoqarfimmi sorlermi najugaqarneq apeqqutaatillugu assigiinngiiaarppoq, illoqarfiilli ataatsimut isigalugit appariaat 4 %-uvoq, nunaqarfinnili appariaat 15 %-ngajaalluni. Siusinnerusukkut inunngorartut amerlassusaasa nunaqarfiit innuttaqassusiat allanngujaatsissimavaa, maannakkulli tassa appariartulersimavoq.

Piffissami tamatumani Kalaallit-Nunaat tamakkerluni 56.370-nik inoqarpoq. Nuna tamakkerlugu agguaqatigiisillugu 2012-mi 0,7 %-mik appariaateqarsimavoq (inuit 379-t).

Ukiuni kingullerni tallimani (2008-2013) inoqarfiit pingasut (imaappoq illoqarfiit nunaqarfiillu) innuttaqassutsimikkut qaffariaateqartoqarnera misigisimavaat, inoqarfiit sisamat innuttaqassusiat appariartuaarsimavoq taavalu inoqarfiit 17-t inuttaqassusiat annertuumik appariaateqarsimalluni. Inoqarfiit sinnerini piffissami tassani innuttaqassuseq allannguuteqarsimanngilaq.

Kommunip immikkortuinut 8-nut tunngatillugu qiviaraanni, Ilulissat kisimik, 2000-miit innuttaqassutsimigut qaffariaateqarsimapput, Upernaviup eqqaa allannguuteqarsimanngitsoq. Qaasuitsup Kommuniani nunap immikkoortuisa sinneri 6-t innuttaqassutsimikkut appariaateqarsimapput. Taamaakkaluartorli 2012-mi illoqarfiit Upernavik Nuullu innuttaqassutsimikkut qaffariarfiunerpaasimapput.

Kalaallit-Nunaat ataatsimut isigalugu innuttaasut amerlussusissaannut missingersuutip (2014-2026) ilaatigut takutippaa, pingaartumik illoqarfiit, amerleriaateqarfigineqarumaartut annermik Kalaallit-Nunaata qeqqani, Qeqertarsuullu Tunuani.

Suiaassutsinut ukiunullu agguaanneri

Kalaallit-Nunaata sinneranitulli, kommunimi angutit amerlanerupput agguaqatigiisitsinermi angutit 52,5 %-upput arnat 47,5 %-ullutik. Pingaartumik nunaqarfinni arnat ikipput.

Kommunip innuttaasa sisamararterutaat sinnerlugit 16-nit inorlugit ukioqarput taamallillutillu atuartuullutik. 66 %-t 17-64-nut ukioqarput, 8 %-t sinnillit 65-t sinnerlugit ukioqarlutik.

Kommunimi ukiunut agguataarsimaneq ataatsimut isigalugu Kalaallit-Nunaata sinnerani agguataarsimanernut naapertuutikannerpoq, taamaattorli ukiuni kingullerni 10-ni innuttaasut sulisinnaassusillit ukioqqortunerulersimallutik aammattaaq 65-t sinnerlugit ukiullit amerleriarsimapput. Innuttaasut amerlassusissaannut missingersuut najoqqutarissagaanni ukiuni aggersuni utoqqaat amerliartussapput.

Innuttaasut ukioqassutsinut agguataarsimaneri imatut isikkoqarput: